martes, 27 de enero de 2009

Carlos Marighella, El deber del revolucionariu (Tino Picos)



Na efervescencia política de los años 60, nel cumal del enfrentamientu ente los bloques socialista y capitalista nun hubo requexu na periferia del mundu que fuera ayenu a la violencia d'esti conflictu. Lluches de descolonización, pola lliberación nacional, pol socialismu o por valtiar la sociedá del espectáculu xorrecíen no que paecía la esplosión de milenta vietnams. En Brasil, un país somorguiau a una dictadura militar sangrina dende l'añu 64, el movimientu revolucionariu tuvo que pasar a la clandestinidá pa poder sobrevivir. Los movimientos de mases de comienzos de la década tuvieron qu'escoyer ente desapaecer o facer el so trabayu dende la solombra. Carlos Marighella, el que fuera un brillante diputáu comunista mentantu hubo democracia en Brasil, foi ún de los qu'apostó por combatir la violencia de la dictadura con más violencia, hasta les últimes consecuencies. En mediu del marabayu de la vida clandestina alcontró tiempu pa dexar escrites les sos idees fundamentales sobre la llucha antiimperialista y el camín de Brasil hacia la revolución. Carlos Marighella. El deber del revolucionariu ye'l primer estudiu monográficu n'asturianu que s'avera a la vida y pensamientu d'esti políticu brasileñu y teóricu de la guerrilla. Inclúi la so obra más conocida, el Manualín del guerrilleru urbanu, llibru señeru pa tolos grupos revolucionarios de los años 70, que desplica de manera mui cenciella los razonamientos d'aquéllos qu'escueyen la violencia como forma de llucha política y les normes básiques de funcionamientu d'una organización armada clandestina.

L'espardimientu tremendu qu'esti llibrín tuvo nel so momentu faen d'él una obra fundamental pa la conocencia de la década na que'l movimientu revolucionariu mundial más cerca tuvo de camudar el nuestru presente.

> Inclúi torna'l asturianu del Manualín del guerrilleru urbanu y «Carta a los revolucionarios europeos» de Carlos Marighella.
-----------------------------------------
Carlos Marighella, el deber del revolucionariu
Tino Picos Maestros.
Llingua: Asturianu.
Colección Mecanoclastia
PVP 5 Euros
108 páxines
Encuadernación rústica con solapes
Llicencia Copyleft (Creative commons 2.0 by-nc-sa)


No hay comentarios:

Publicar un comentario en la entrada