martes, 27 de enero de 2009

Casería y Socialismo: nación asturiana y marxismo nacionalista (Carlos X. Blanco)


El prolíficu filósofu asturianu analiza na so obra cabera, Casería y Socialismo: nación asturiana y marxismo nacionalista les claves identitaries de la nuestra tierra.

Casería y Socialismo: nación asturiana y marxismo nacionalista ye´l segundu ensayu de Carlos Xabel Blanco, profesor de filosofía asturianu afincáu en Ciudad Real, y el primeru qu´espubliza con Glayíu Editorial. La obra s´avera en clave marxista al estudiu pormenorizáu de la evolución socioeconómica d´Asturies a lo llargo de la so hestoria, sacando como idees-fuerza la diferenciación del modelu económicu tradicional asturianu, afitáu na autosuficiencia y la llibertá de los individuos, frente al modelu espansivu-esclavista castellanu y mediterráneu. Blanco destaca tamién la casería tradicional asturiana como unidá económica básica de la nuestra tierra hasta va bien poco, y plantea la necesidá que tien Asturies de desendolcar la so propia democracia económica si nun quier sucumbir como pueblu dientro del actual modelu de globalización transnacional.

La obra cuenta con prólogu de José Carlos Loredo Narciandi, profesor asturianu d´Hestoria de la Psicoloxía na UNED, tituláu «¿Se puede ser de izquierdas y nacionalista?».

Con Casería y Socialismo: nación asturiana y marxismo nacionalista, Glayíu Editorial estrena la coleición Orbayu, na que verán la lluz obres que dende xéneros y enfoques estremaos tengan como exe principal Asturies y los asturianos.

------------------------------------------

Casería y Socialismo: nación asturiana y marxismo nacionalista
Carlos X. Blanco
Glayíu Editorial, Uviéu, 2008
ISBN: 9788461233632
288 páxines, edición rústica
PVP: 12€

1 comentario:

  1. Teníais que facer una torna del llibru al asturianu. Norabona.

    ResponderEliminar