Entrevista a Carlos X. nel selmanariu Les Noticies

DOCTOR EN FILOSOFÍA

Carlos X. Blanco: «Han buscase formes de vida acordies coles nuestres maneres de relación col territoriu»

11 de xunetu de 2008

Casería y socialismo. Nación asturiana y marxismo nacionalista (Glayíu Editorial) ye la última obra del pensador Carlos X. Blanco, qu'analiza la evolución socioeconómica d'Asturies y apurre claves pa dir diendo camín d'una «democracia económica». El llibru preséntase'l 19, a les 21.30, na carpa de Radio Kras na Selmana Negra.

B. R. V.
-Nel prólogu de Casería y socialismo Loredo Narciandi destaca la importancia d'analizar Asturies dende la emigración, como ye'l so casu. ¿Qué se ve dende fuera que nun se vea dende dientro?
-La mio experiencia ye que viviendo dientro tiense una concencia difusa de que los asturianos somos diferentes del restu de los pueblos del Estáu, pero en cuantes qu'ún vive fuera dase cuenta de que les diferencies son mayores de les que pensaba. Cuando voi p'Asturies veo que los mios paisanos tán davezu acomplexaos énte la xente d'otros pueblos y esto nun respuende a la realidá: Asturies tien una historia mui particular, dacuando dramática, con cambios mui grandes nel mou de producción, tien una experiencia obrera y de llucha, de recepción d'emigración, una herencia illustrada... Hemos tener l'arguyu d'esa experiencia, conocela y estudiala más y l'alteridá qu'ún carez cuando ta emigráu ye una ayuda pa eso. Hai una concencia d'identidá nacional soterrada qu'había qu'emburriar más.

-¿En qué se manifiesta esa identidá nacional?
-Ún pegollu importante ye la llingua, pero hai que sorrayar otros como la casería, la manera de relacionanos col paisaxe... Los asturianos piensen que l'ecoloxismu y el cuidáu del mediu son idees veníes de fuera, pero n'Asturies too eso yá taba inventao nun socialismu preindustrial, na autosuficiencia y el desarrollu harmónicu pa col mediu... Nes formes tradicionales de vivir yá había una montonera de práctiques qu'habíen recuperase adaptándoles al mundu actual.

-¿En qué se basa pa poner la casería como elementu central d'esa recuperación?
-La casería ye una unidá autosuficiente, ye como la nación asturiana en pequeño. En círculos concéntricos fórmase'l país asturianu: la casería, el conceyu..., y la propia nación como hermandá y xuntura de conceyos.

-Choca qu'escueya esti elementu como base del socialismu cuando lo habitual ye tirar de la tradición de llucha obrera.
-Nun arrequexo nin el socialismu nin el movimientu llibertariu de la etapa industrial: son parte de la nuestra experiencia y por eso tovía hai una concencia ilustrada y d'esquierda na sociedá asturiana. Pero hai un socialismu preindustrial mui antiguu, inclusive d'enantes de la invasión romana, que s'espeya nun sentíu colectivista y de solidaridá na relación ente los llabradores. L'Asturies tradicional yera una andecha xeneralizada tol añu y en tol país, dalgo que nun se perdió del too. El movimientu obreru que principia nel xix tien una continuidá con esi socialismu preindustrial: el primer obreru asturianu primero de desenraigonase del too yera un llabrador; inclusive nel xx hai una montonera de xente obrero que ye llabrador, anque sía de fin de selmana. Esi sentíu de la solidaridá y esi arguyu por defender lo propio que se pon en comuña cola sociedá tovía existen. Los dos socialismos definen bien el carácter del país asturianu. La casería asturiana, a nun ser la noble, nun ta venceyada a los privilexos, sinón a l'autosuficiencia, anque davezu ésta fuera l'autodefensa de los probes. El nacionalismu asturianu ye dalgo mui popular, que nun tuvo que ver cola defensa de privilexos sinón cola defensa de l'autosuficiencia y pa mi sí hai una continuidá ente los dos tipos de socialismu.
Otra manera, pal futuru habrá que tener un modelu de país y nun se trata de recular na historia: la casería tien posibilidaes si nun s'especializa demasiao y ye fundamental el cuidáu del mediu rural. Habría que repoblar y revitalizar l'aldea como base de la sostenibilidá, integrándola con industries pequeñes sostenibles y refugar el modelu d'apiñanos toos nel centru.


http://www.lesnoticies.com/index.asp?cod=2228&idage=3050&te=3&vap=0&acc=hinfo

http://www.lesnoticies.com