LES PALLABRES DEL BUEN ALCALDE

El pasáu xueves 19 presentóse en Xixón el llibru José Manuel Palacio. Otra política es posible, volumen que recueye los escritos del primer alcalde de Xixón tras el franquismo. Puede que les xeneraciones más moces nun conozan quién fue esti paisanu, polo que convenía facer una pequeña semblanza de la so persona.

José Manuel Palacio foi´l primer alcalde qu´escoyeron los xixoneses tras el franquismo, y gobernó la ciudá durante ocho años dende les files del PSOE. En 1987 resultó apartáu de la reellección por una asamblea manipulada na que salió candidatu a l´alcaldía Vicente Álvarez Areces. Manipulada porque la candidatura de Areces tuvo afiliando illegalmente a cientos de nueves persones hasta la mesma tarde enantes de l´asamblea.

Resabiáu del rumbu que taba tomando la naciente democracia, Palacio retornó a la vida política con una formación local e independiente, Unidad Gijonesa, cola que sería conceyal de 1991 a 1995.

Apartáu yá de la vida política, dedicóse a escribir artículos de prensa nos principales medios escritos asturianos, colos qu´abordaba la política local, asturiana, estatal e internacional. Palacio yera un autor solvente, qu´acompañaba cada escrito con una contundente batería de datos y documentación, concisu, y políticamente mui incorrectu. Destaca la so valentía a la hora d´abordar temes sobre los que´l pensamiento únicu dominante nun almite dudes o matices, como la problemática vasca y el nacionalismo español, el totalitarismu de la partitocracia, les por aquel entonces nacientes corruptelas polítiques, o la pinza informativa que caltienen los medios de comunicación.

El xueves 19 xuntáronse unes cien persones nel Colexu Públicu Jovellanos de Xixón para reivindicar la figura y les idees de José Manuel Palacio. Falaron los compañeros de Palacio en Unidad Gijonesa Armando Nosti y Luis Álvarez, el periodista del diariu El Comercio Vicente Bernaldo de Quirós, y el coordinador de la obra, Omar Tuero. Toos ellos recordaron al fallecíu políticu y destacaron los sos valores, que lu llevaron a ser reconocíu por propios y estraños como “el políticu más honráu que tuvo la ciudá de Xixón”Sicasí, más allá de la persona, queden les sos pallabres, y con elles la posibilidá de llevales a la práctica.